年初宣布约满离巢的TVB艺人李施嬅，日前被邀到纽约参加Fashion Week，首次参与其中嘅佢开心话好兴奋、好感恩︰「觉得自己好幸运，见到好多明星，个个都好靓，觉得呢个靓係喺现场係变得Normal，希望有日都可以同国际巨星合作。」
为接受未来嘅挑战，她积极备战，增值自己︰「咩堂都会去上，戏剧班、武打、唱歌乜都要识，做演员有好多嘢都唔可以临急抱佛脚，外国有啲明星做戏可能要用一年嘅时间去准备，依家尽量都去学多啲唔同嘅嘢。外国演员每一个都好高水准，甚至係临时演员都好有演技，自己都会紧张同有压力。
不过之前喺加拿大都有拍过嘢，觉得TVB帮我打嗰个底打得好好，记连戏动作、走位、演戏、专业态度、背剧本精神，所有基础都係TVB送畀我嘅礼物，出到去啲Crew都好讚，觉得我好专业，呢个功劳係TVB。（依家变咗『空中飞人』？）希望留多啲时间喺香港宣传《金宵大厦》，之前去美国一个月，尽量短飞。」
由港姐入行至今，离巢一刻李施嬅坦言每一个曾经帮过佢嘅人都要多谢︰「喺TVB学咗好多嘢，有好多嘢袋落袋，今时今日嘅我係咁多年嚟磨练出嚟，先可以走得更远去工作都得到尊重，得着係呢个Training，真係乜到得，之前喺加拿大拍剧，有时拍拍吓有啲场口想改期拍，问我介唔介意，我都会话OK，我飞稿拍都得，但原来第二啲演员係唔得！
另外嘅演员係唔够时间准备，佢哋要係Set好晒个时间表，去到嗰边拍剧我会觉得好轻鬆，所有嘢都可以准备得更好，临时叫我做一场戏都可以，呢样嘢係真係要好多年磨练番嚟，TVB出嚟係唔怕辛苦，可以捱更抵夜，出面啲演员会好吃力，但我哋OK，当时我哋做会係好辛苦，但依家你会知道係先苦后甜感觉。」
